شعب لامؤاخذة !!

الموضوع ده أثار تعجبي من فترة منذ أن رصدته.. ولحد دلوقتي لأنه بيتردد على مسامعي بصورة شبه يومية ..

وهو استخدام الشعب المصري- وأعتقد إن هو الشعب الوحيد!! -لكلمة (لمؤاخذة) في كل كلامه .. سواء من فئة العمال والصنايعية والفلاحين.. إلى فئات بعض المثقفين .

والأعجب إن كلمة لمؤاخذة بتستخدم في مختلف التعبيرات .. مش مجرد إنها تسبق كلمة قبيحة أو خارجة أو غير لائقة .. إلخ

يعني مثلا .. ممكن تلاقي واحد يقول وهو بيكلم واحد .. الشخص ده لمؤاخذة حمار !!طيب هنا فهمت إن كلمة حمار اعتبرها الشخص شتيمة .. لذلك احتراما للمتكلم قال (لمؤاخذة) .. مع إن هو قال عليه حمار وشتمه وبهدل الشخص بالفعل .. يعني مؤاخذته مالهاش أي قيمة .

بل ممكن تسمع واحد يقول .. فلان ده (لمؤاخذة) ابن .... !!

بل أنا خايف أتفرج مرة على خلف الأسوار ألاقي قتال قتلا بيحكي عن جريمته للمشاهدين .. ويقول للمذيعة أنا (لمؤخذة) قتلته ومعترف ! .

واستخدام الكلمة يمتد للكلام العادي .يعني ممكن واحد يقول للتاني .. أنا اشتريت النهاردة (لمؤاخذة) جزمة ..هل لأن جزمة موجودة في الجملة فده يجعلها شيء غير محترم ينبغي إن يسبقها لمؤاخذة ؟!!فيها إيه يعني لو قاله أنا اشتريت جزمة .. هل كده خرج عن الزوق العام ؟! .. طبعا لا !!

بل كلمة (لمؤاخذة) .. امتدت للكلام العادي جدا ممكن واحد تلاقيه بيكلم التاني ويقوله .. أنا كنت رايح (لمؤاخذة) للصيدلية أشتري دوا .. ولاقيت الصيدلي هناك وكان سمعه تقيل .. فقعدت أشاورله وأوصفله الدوا بايديا .. كده لمؤاخذة .. ولما خرجت شاورت لمؤاخذة لتاكسي علشان أروح .. ولما روحت لمؤاخذة اتعشيت !!

أحيانا بتكون الكلمة دي لا إرادية .. وأحيانا بتكون الكلمة مقصودة ..بس لحد دلوقتي نفسي أدخل في دماغ اللى بيقولها دايما بتعمد . وأشوف وجهة نظره !!

ما بنكرش إني بقولها أحيانا .. بس بستخدمها بمعنى الأسف أوالاعتذار .. خبطت في واحد وأنا ماشي أحيانا أقوله آسف أو لمؤاخذة .. لكن ما تبقاش حياتي كلها لمؤاخذة يعني !

لمؤاخذة أزعجتكم !