عقبال صاحبنا !!
وأنا قاعد في كورس من كام يوم المعيد حاول يدينا راحة نريح فيها نفسنا شوية من التركيز والشرح ..
المهم حاول يفتح موضوع .. إتكلم عن صدام .. وإن إزاي هو شرّف المسلمين .. وإزاي كان واقف زي الصقر ..إلخ
طبعا الناس اللي كانت معايا قعدوا يتكلموا معاه في الموضوع وأنا ساكت ومستمع ..
بغض النظر عن اتفاقي مع صدام أو لا.. بس طبعا شايف إن محاكمة من الأساس بهذه الطريقة خاطئة ..
عموما موضوع إعدام صدام مش هي القضية دلوقتي .. لأن الآراء اختلفت .. وناس أيدت وناس عارضت .. وناس فرحت وناس حزنت .. وموضوع إعدام صدام عايزله موضوع لوحده!)
المهم بعد ما خلّصوا كلام .. وبعد صمت قلت جملة بسيطة جدا : عقبال صاحبنا
فجأة خير اللهم اجلعه خير لقيت شبه انتفاضة وعصيان على الجملة دي من جميع الاتجاهات .. المعيد يقول: حرام عليك يا راجل
واحد يقول : ليه بس كده؟ .. واحدة تقول : والله ده طيب . يرجع المعيد يوجه ليا الكلام ويقول : كفاية بس إنه معيشنا في أمان وإن مافيش حد دخل أرضك.. ممكن نستحمل الفقر والعيشة الصعبة بس ماحدش يدخل أرضنا .
كان الهجوم والاعتراض من كل ناحية .. متهيألي لو كنت سبيت الدين ماكنش الكل هايتحمق كده !
مش عارف ليه التزمت الصمت نهائي وقعدت مبتسم ..برغم إن الكلام ده كله مردود عليه بسهولة ومنطقية وياما اتكلمنا في حاجات أصعب من كده..
هل كان بسبب الإحباط .. خصوصا إن الناس كلها كان رأيها واحد؟
ولا نوع من اليأس إن مهما اتكلمت مافيش فايدة على رأي سعد زغلول؟
ولا بعد مناكفة مني في حتت كتير .. بتييجي فترة الواحد حيله يتهد خالص .. لحد ما أعيد شحن نفسي وتدعيم نفسي بالأمل والقتال؟ (تقريبا الحل هايفضل كده لحد ما أموت!)
ولا كل الأمور دي مجتمعة؟
الغريب إن معظم الطلاب لما تييجي تكلمهم .. يقعد يلعن في حال البلد .. وإن الحياة صعبة .. وإن مافيش شغل .. وإن دي بلد بنت داعرة (طبعا مش بيقولوا كده بالتحديد بس علشان لزوم النشر نختار كلمة أفضل!) .. وإن وإن وإن !
ولما تشوف حمقتهم على حبيبهم .. تستغرب ! ... زي ما يكون الحاجات اللي بيشكوا منها متأيدة ضد مجهول !
المعيد نفسه اللي بيتكلم .. أنا أعرفه معرفة شخصية .. وهو مرتاح ماديا ومتجوز وعنده عربية وكل أموره جيدة خصوصا لسنه الصغير وخصوصا إذا قارناه بشباب كتير ..
هل لو كان بيعاني زي معظم الشباب .. كان هايغيّر رأيه؟ .. وهل كون إنه مرفه يديه الحق إنه ما يحملش هموم وطنه؟!.
الموقف ده لغاية دلوقتي لسه معلق معايا .. وبقالي فترة بقابل زيه كتير
الواحد واثق إنه صح .. بس صعبان عليا إن بسببهم الصح ده صعب يكون عند الجميع
عقبال ما صاحبنا نتمكن من محاسبته وإعدامه ميت مرة .. بس بشعبنا ومحاكمنا وبإيدينا !
هناك ١٢ تعليقًا:
ياااه تصدق بالله ..والله كنت لسه حاكتب عن الموضوع ده من كام يوم بس قلت اخلص امتحانات وافوق وابقي اكتب اللي حصل معايا يوميها
اصل حصللي نفس الموضوع ده كان معيد برضه - بنفس المواصفات اللي انت بتقول عليه مستوي وعربية وان كان يزيد ان باباه مهندس معماري كبير - واحنا قاعدين انا وكام واحد وواحدة وبيصححلنا لنا المشاريع واخدنا ريست بنقول نكت وبنهزر وكده واتكلمنا في مواضيع عامة ودخلنا في كلام عن السياسة واتكلمنا عالامن في مصر والريس وصدام
انا بجد صعقت من الافكار انا كنت فاكرة ان الناس فاقت وان كله عارف اللي فيها
بس طلع لسه في ناس بتكلمك بنفس منطق هو معملش فينا حاجة وحشة وجملة "كفاية بس إنه معيشنا في أمان" اتقالت برضه
انا برضه قعدت ساكتة مش بتكلم لغاية ماقال اكتر جملة استفزتني ان قال ايه الامن اللي في المظاهرات والتجمعات ده بيحمي المتظاهرين الصراحة لقيت في ناس موافقينه وعشان انا شوفت صور للي بيحص وجربت الامن كتير وخاصة يوم عرض اخويا عالنيابة مقدرش انساه بجد ...وحسيت بمعني يعني ايه الامن يبقي واقف عشان حاجة واحدة بس انه يمنع اهالي المعتقلين انهم يشوفوهم او حتي يقربوا منهم علي بعد 3 او 4 متر بجد رحت طلعة فيه ..اه لقيت في الاخر ان مفيش فايدة فعلاااااااا علي راي سعد وعلي رايك طبعا .. بس بجد يوميها كانت صدمة كبيرة ليا
لدرجة اني شكيت ان الناس دي عايشة في نفس البلد
تعرف موضوع ان الانسان يبقي مرفه من هو وسنه صغير ده فعلا بيأثر
انا اغلب الناس اللي اعرفهم كده - من الكلية عامة والقسم علي وجه الخصوص وانت عارف عمارة وطلابها- لما تلاقي اللي ادامك اغلب اهتمامه انه زعلان عشان باباه مش عايز يجددله عربيته او ان باباه بيزعقله عشان بيركب تاكسي كل يوما امال يركب ايه يعني ياي مشروع او انه مش عايز يشتغل مع باباه وعايز يفتح مكتب لوحده او انها تجيب الفستان من المحل اللي اسمه كده ولا اسمه كده والاتنين اسعارهم خيالية وانها ازاي تبقي استايل والكلام ده والشريط الجاي لمش عارفة مين واننا نتغدي في المطعم الفلاني ولا الفلاني ولا اننا نجيب دلفري من هنا ولا من هنا ونتفسح فين !!؟؟ لما تبقي كل حياتهم واهتمامتهم كده حيهتموا باللي مش لاقي ياكل ازاي ولا حيحسوا بالناس التانية منين
يبقي بتفرق طبعا
ماشي مش عند كل الناس بس ده تقدر تقول ان اغلب اللي انا شفتهم كده
كلمة ملهاش لازمة وقفت في زوري " تفتكر ليه زعلانين من عمرو خالد وغضبانين ان اغلب كلامه موجه لطبقة الناس ذوي المستويات المرتفعة "!!؟؟
يووووووه عالرغي وسنينه كفاية كده
هي ثقافة سائدة بنت ستين في سبعين، يعني ربنا قال "فاستخف قومه فأطاعوه إنهم كانوا قوما فاسقين" والناس هنا يظهر عاجبها الاستخفاف اللي السلطة بتتعامل بيه مع الناس، وللأسف بلدنا قدامها كتير قوي عشان يتصلح حالها طول ما قطاعات كبيرة بتفكر بالطريقة الساذجة الهروبية المتخلفة دي
أنا عايزه أعرف حاجة بس يعنى
هو بجد لسه فى ناس كده؟؟
فى لسه ناس شايفينه طيب و بعد الشر عليه و حامى البلد و شفت هو حلو إزاى؟
إية الناس دى..؟
بجد لو مصر فيها نسبة كبيرة من الناس دى يبقى نستاهل اللى بيحصل فينا
.
.
ماتروحش الكورس ده تانى يا حامد
;D
.
.
مها
انا شايفة الردود اللي قبلي قالت كتير من اللي كنت هقوله
بس حبيت أوضح فكرة ليها علاقة بالموضوع كمان
الناس اللي كانت بتقول إحنا شعب مش عارف ايه وفيه ايه
وشايفين ان الاصلاح يأتي من الأسفل
لأ معلش بقى
الاصلاح-لو فيه اصلا-مكانه من فوق
طول ماهو مكانه بالشكل ده وبطريقة الحكم دي
هنفضل زي ما احنا كدة
هتفضل اللغة السائدة في مصر هي الفساد
كل صغيرة وكبيرة لو تتبعناها هنلاقي ان حكمه هو السبب فيها
حتى لو كان طالب بيغش في امتحان!
وبالنسبة لان فيه ناس ولا على بالها
فده برضو عادي
أصل هو مش تعبان في حاجة
الفلوس موجودة
اللي عايزه بيلاقيه
مش حاسس انه مديون أو مضغوط أو متبهدل وشايف المر عشان ياكل عيش
فخلاص بقى يبقى عصر مبارك بالنسبة له
أكتر زهزهة
مين اللي بيحس بالظلم بقى
بقية الشعب
اللي بيركبوا اتوبيسات يتبهدلوا فيها عشان التاكسي يخرملهم الميزانية
اللي بيضطروا يشتغلوا 3 شغالانات في اليوم عشان ولادهم ومدارسهم
هما دول اللي شارببن المر من حكم الأخ
وبصراحة الواحد أصلا بقى على رايك ياحامد بيتعب من الجدال
حتى لو متأكد إن كلامه هو الصح
هو عارف انه هيتقال والناس هتدخله من هنا وتخرجه من الناحية التانية
ومنابهوش من كل وجع الدماغ ده
إلا حرقة الدم
أحياناً والله بفكر إن ربنا بيسلط أبدان على أبدان
وإن فيه ناس تستاهل البلا اللي احنا عايشين فيه ده
سوسكا
على رأيك .. زي ما يكون مفترض علشان الحاكم يكون وحش إنه يجلدنا في الشارع ويغتصب زوجاتنا !
على فكرة فيه ناس كتير أعرفها مرفهة وأكتر كمان من المعيد ده .. بس مآمنين بقضية ده أولا .. وتاني حاجة قروا واتلطعوا والأهم إنهم فكروا !
عمرو
كان إبراهيم عيسى كاتب مقالة جميلة على آية "استخف قومه"
فعلا بدلنا قدامها فترات طويلة على ما نفوق .. مش تشاؤم ..بالعكس أنا من الناس المتفائلة دائما لأن بدون التفاؤل حياتنا ما يبقاش ليها قيمة ونموت أفضل
ولكن الواحد برضه لازم يقرر الواقع وما يضحكش على نفسه !!
مها ذات الباص وورد الضائع!
===
أه فيه ناس كتير بتفكر كده .. إنزلي بس من البرج العاجي وإنتوا هتلاقي بلاوي
!
برغم إن البلد حالها إتحسن شوية وبقالها سنتين على كده من حيث الأفكار والمظاهرات والمدونات ..
بس إنتي بتتكلمي في 70 مليون !!
ولسه لما نشوف بتوع التعداد هيجيبولنا الرقم الجديد كام
!!
مصر بتخلف لحمة من غير عقل
ملكة
===
هو اللي إحنا فيه ده مالوش عذر .. ولكن الشعب فعلا مغيب ومضغوط بضغوطات الحياة
زمان أنا مثلا كنت بقرأ الأهرام والأخبار وما بلاقيش غيرهم
قبل ما أتفرج على الجزيرة.. كنت بسمع كلام الميديا المصرية عن إن الجزيرة ضد مصر وإنها قناة مش عارف إيه .. وكنت مصدق
لما الواحد كبر شوية واطلعت على حاجات أكتر وفكرت .. اختلف التصور جدا
حتى قلت لوالدي ما يبقاش يشتري الأهرام والأخبار لأن بقيت بتقرف من كم النفاق والكذب
حكاية إن ربنا بيسلط أبدان على أبدان
كتير من الناس الدينة بيستخدمها استخدام خاطئ
يعني يقولك لأننا بعاد عن الدين .. ربنا سلط علينا واحد نستحقه
ومش فاكر فيه حديث بيحمل نفس المعنى ده يارب أفتكره
وإن لو احنا كويسين كان جالنا جالنا حاكم كويس
الكلام ده أنا معترض عليه لسببين
أول حاجة : إن معظم الناس اللي بيقولوا كده ما بيعملوش حاجة .. يا فرحتي أقول الكلام ده يقتصر التصرف على إصلاح نفسي وأسرتي دينيا وخلاص..
طب ما انتا وسط مجتمع .. إتكلم يا بيه وقول رأيك ..
يقولك مش وقته .. طب إمتى هاييجي وقته..
ولو جه وقته مين اللي هايحدد إن وقته جه؟
تاني حاجة: برغم أن العامل الديني لو التزمنا بيه في كل شيء هايبقى فيه تقدم لأن الإسلام دين شامل
ولكن ..
فيه حاجات ممكن تمشي من غير دين .. أه وجود الدين هيكملها بس فيه حاجات بتضخع للأعراف العامة والمبادئ اللي عند كل الشعوب والأديان الأخرى
واحد بيسرق .. الطبيعي انه ما يسرقش وإن لو فيه قانون بشري حتى سليم هايدينه ويوقفه عند حده
واحد مثلا بيعذب .. الطبيعي إن فيه حرية ولو فيه قوانين بشرية منفذة ماحدش هايعمل كده
قطاع السياحة مثلا والصناعة والزراعة .. والتدهور المستمر
ما ممكن يحصل تقدم فيهم لو حطينا قوانين مميزة وطبقناها على اسس سليمة والتزمنا بيها
حاجات كتير المفروض من غير أي حاجة المفروض تتنفذ
ماهو ممكن واحد ملحد يمسك البلد ويخليها تزدهر صناعيا واقتصاديا وثقافيا وكل حاجة
هل ده ما بيحصلش؟
انا عارفه ان بلدنا عايزة اصلاح وان فيه فساد فى البلد والبلد دى قدمها كتير اوى لغايه لما تتغير ..
بس انت شايف ان حالنا وصل للعراق وان اللى عندنا يستاهل الاعدام زى ما بتقول ..؟؟؟
انت بتقول انت واثق انك صح وان بسبب اللى احنا فيه ده صعب الصح يوصل للجميع..دى اكتر نقطه انا معاك فيها وان كنت اختلف معاك فى اخر جمله اللى كتبتها بالبلود دى.. ايوا قله شايفة صح وانت مش بأديك حاجه تعملها
..اللى بيضايقنى ان انا بقول النظام والحكومه واقعد العن فى سلسفين الحكومه ..تعالى بقى للشعب..وعشان مكبرش الموضوع تعالى لصحابك واهلك والناس اللى حواليك..شوفهم بيفكروا ازاى..وماشيين ازاى ..تعالى اقلهم خدوا موقف..تعالى قلهم يا جماعه هنقاطع التليفونات عشان الفواتير اللى عليت..تعالى قولهم مش هنركب مواصلات النهارده عشان الاجرة اللى عليت ولازم ناخد موقف..تعالى قلهم مش هاندفع الكهربا عشان الزباله اللى بيخدوها على الفواتير وبعد ما االمحصل يمشى تبص قدام شقتك تلاقى الزباله مكانها او قدام العمارة ..تعالى قولهم اى موقف مستفز وبيحصل لنا كل يوم فى حياتنا...الرد الطبيعى لا يا سيدى هادفع وامرى لله..طب والنبى ده كلام..وتقولوا اصلاح ومن فوق ومش عارف ايه.. وتسمع اللى يقولك انا مش عارفه احنا حصلنا ايه وبقينا ليه كده( لا حصلنا كتير اوى وشوفنا كتير اوى ..واللى بيحصلنا يخلى اى يحد يثور ويغير اللى فيه)..بغض النظر عن المفاهيم اللى بقت موجوده عندهم.. وان كفايه ان احنا فى امان وكفايه انه طيب..لا الشعب خلاص اتحكم واتهد..ومبقاش عنده قباليه للتغير..اوقات الضيق بس يثور ويرجع زى الاول واسخن..للاسف احنا عاملين زى المارد اللى بقاله كتير ماثرش وداخل القمم ومش عايز يتحرك وراضى باللى بيحصله .. واخيرا اذا الشعب يوما اراد الحياة لابد ان يستجيب القدر
dina
بصراحة يا دينا شايف فعلا إنه يستحق الإعدام .. وحضرتك لو بصيتي في كل منحي الحياة في مصر هاتحسي بالمأساة إللى احنا وصلنالها
بصي مسألة إن الشعب المصري بيقوم بأفعال سلوكية معينة أو السلبية اللي عايشها أو حاجات كتيرة
أنا مؤمن بحاجة معينة .. إن الإصلاح له طريقين لا ثالث لهما
أول حاجة إنك تصلح القاعدة وفي نفغس الوقت الرأس عن طريق المعارضة .. إلخ
الحاجة التانية لو مانفعش ده . يبقى ما قدامكش غير إن الرأس نفسها تتبتر وييجي محلها رأس سليمة عندها ضمير وهيا اللي ساعتها هاتغير القاهدة عن طريق القوانين والإلتزام بيها وتنفذيها والعدالة والحرية .. إلخ
بس ده طبعا ما يديش أي عذر للشعب .. المفروض الإنسان يكون رقيب نفسه حتى لو هيه سايبة زي دلوقتي.
ممكن اتعلمت حاجة بسيطة جدا كنت بنسااها دايما .
كنت مثلا ممكن أمشي في الشارع أرمي منيل أو كيس بسكوت حتى
الواحد ماكنش بياخد باله قوي ..
جت واحدة قبل كده عزيزة عليا كانت بتمسك ده من ايدي قبل ما أرميها وتعينها في شنطتهامثلا لحد ما تروح
حاجة بسيطة علمتني حاجات كتير
بالتالي الشعب فعلا عايز حد ياخد بيده
احنا بنتكلم في 70 مليون.. لو حلقت على شوية الباقي هايسرح .. لو جيت للباقي الشوية الأولانيين هيسرحوا
خصوصا إن مافيش تعلييم ولا ثقافة ولا أي حاجة
الحل الوحيد مع مصر هو الثورة والبتر .. الإصلاح على المدى البعيد مش هايجيب فايدة من وجهة نظري
وأخيرا .. إذا الشعب يوما لم يرد الحياة .. فهنخليه يرد الحياة بالعافية
:d
برافو عليك انك قلتها..... السادات كان عنده حق أما كرر اننا شعب عاطفي... هما مش حاسين... لأن ببساطة النظام خدم الأغنياء و خلي المرتاحيين ماديا من أصحاب الطبقة الفوق متوسطة يرقصوا أكتر ماهم بيرقصوا علي السلالم بس برضو مرتاحين و نصيحة مني.... ماتساعدش مريض مش عايز مساعدة رغم انه عارف بمرضه
بلا هم
www.salkher.blogspot.com
أهلا علية
إحنا فعلا شعوب عاطفية .. ومش شايف إن ده عيب
لكن العيب إننا نوظف العاطفة دي في شيء خاطئ ومن أجل أشخاص خطأ
طيب برغم إني مقبنع إنه يستحق الإعدام رميا بالمنجنيق-على تعبير واحد أعرفه- مع ذلك هاقول
مبارك ما يستحقش على الأقل محاكمة وعلى الأقل يتحبس بمقدار الجرائم اللي قام بيها .. سواء في حق أشخاص ولا في حق البلد
ربناي رحمك يا عمر بن الخطاب ..لو عثرت دابة في العراق !
وإحنا الناس عندنا بتقع في البلاعات
!
إرسال تعليق